2019 senesiniñ başından berli Rusiye quvetçileri işğal altındaki Qırımda 80 tintüv keçirdi, 126 insannı tutıp aldı ve 282 kişini apiske aldı. Bu aqta Qırımtatar Milliy Meclisiniñ azası, Qırımtatar resurs merkeziniñ idare reisi Eskender Bariyev matbuat konferentsiyasında ayttı.
QRM siyasiy mabüsler cedveline 99 insannı kirsetti, 80-i – qırımtatarıdır. Bariyevniñ aytqanına köre, 99-dan 88-i SİZOda ya da koloniyada buluna, 11 kişi ya şartlı üküm aldı ya da ev apsinde buluna.
80 tintüvden 62-si qırımtatarlarnıñ evlerinde keçirildi. Bariyevniñ qayd etkenine köre, tintüvlerniñ büyük qısmı siyasiy ya da diniy sebeplernen bağlı. Çoqusı allarda Rusiye quvetçileri qırımlılarnı Rusiyede yasaqlanğan «Hizb ut-Tahrir» ve «İyegova şaatları» teşkilâtları ve «qanunsız silâlı birleşmelerde» iştirak etkeninden şübheli dep saya.
Merkezniñ bağ idarecisi Elvir Sagirmannıñ aytqanına köre, yılnıñ başından berli işğal etilgen Qırımda adaletli mahkeme aqqı 578 kere bozuldı, 408-i qırımtatarlarnen bağlı edi.
Qırımtatar Resurs Merkezi – qırımtatarlarnıñ siyasiy ve cemaat faalligi seviyesini arttırmaq, qırımtatar halqınıñ aq ve serbestliginiñ qorunmasına yardım etmek, qırımtatarlarnıñ milliy kimligini saqlap qalmaq, qırımtatar medeniyetini inkişaf ettirmek maqsadınen qurulğan cemaat teşkilâtıdır.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
