Qırımda eki ay devamında qızamıq çıqarmaqnıñ 40 adisesi qayd etildi.Bu aqta Qırım Sağlıq nazirliginiñ bala ekimi Lüdmila Prokudina bildirdi, haber ete “RİA Krım”.
“2016-ncı yılğa qadar bizde qızamıq qayd etilmey edi, amma 2017 senesinden 2019 senesinece qızamıq adiseleri belli ola ve çoqlaşa. Keçken yıl 27 qızamıq adisesi qayd etildi, bu yılnıñ eki ayı içinde ise endi tasdıqlanğan 40 adise oldı. Menimce, bu raqam artacaq”, - dedi o.
Prokudina, bu hastalıqtan yalıñız aşılav qurtara bilecegini bildirdi.
2018 senesi ilhaq etilgen Qırımnıñ Aqmescit, Kezlev ve Saq rayonlarında qızamıq çıqarması qayd etile edi. Rospotrebnadzor 17 adiseni tasdıqladı.
2018 senesi Bütün dünya sağlıq saqlav teşkilâtı Avropada qızamıq adisesiniñ rekordlı çıqaruv sayısı belgiledi. İlk altı ay devamında 41 biñ adamdan çoq qızamıq çıqardı, bu - keçken 10 yılnıñ eryıllıq köstergiçlerinden çoq.
Qızamıq adamdan-adamğa qolaylıqnen keçe, öksürik, yaqın toqunuvlarnen keçe. Virus eki saat devamında faal qalıp, avada ya da ten üstünde yaşay. Hasta başta sade suvuqlanuv alâmetlerini duya: tımav, sıcaqlıq, öksürik, tahminen bir aftadan eşken peyda ola (evelâ başta, soñ - bedenniñ yuqarı ve tüpteki qısımlarında). Qızamıq sebep olğan ağırlaşuvlarnıñ arasında - siñir sistemasınıñ zararlanuvı (entsefalit), pnevmoniya, otit, körüv qabiliyetiniñ ğayıp oluvı bar.
