Soñki dört ay içinde 45 biñden ziyade qırımlı biometrik çetel pasportını almaq içün esas Ukrainadaki migratsion hızmetine muracaat etti. Bu aqta Ukrainanıñ işğal etilgen topraqlar meseleleri naziriniñ birinci muavini Yusuf Kürkçi matbuat konferentsiyasında ayttı.
«Bu daqqa aktual olğan er angi malümat bir saattan soñ aktual olmaycaq. Amma bu yılnıñ 4 ayı içinde 46 ya da 48 biñ pasportqa yaqınlaşqan raqamnı endi eşittik. İşğal etilgen topraqlarda yaşağan vatandaşlarnıñ bu hızmetten faydalanması norma ola. Pasportnı aluv tertibi işğal altında yaşamağan vatandaşlarnıñ tertibinden biraz farqlı olsa da, bu mania olmay ve insanlar hızmetten faydalanmaq içün bütün vesiqalarnı ketirmege tırışa», – dedi Kürkçi.
Daa evel Herson vilâyetindeki Ukraina Devlet migratsion hızmetiniñ idaresi 2014 senesinden başlap çetel pasportını alacaq olğan 78 395 qırımlı Herson vilâyetiniñ migratsion hızmetlerine muracaat etti, dep bildirgen edi.
2017 senesi iyünniñ 11-nde Ukraina vatandaşları içün Avropa Birligi ve «şengen» memleketlerine yapacaq qısqa ziyaretlerde (çalışmamaq şartınen er 180 kün içinde 90 künge qadar) viza serbestligi çalışıp başladı. Vizasız rejim Büyük Britaniya ve İrlandiyadan ğayrı Avropa Birligi ve «şengen alanı» aza devletlerinde keçerli. Bu rejim Felemenk ve Frenkistannıñ «sıñırdan tış mülkiyetinde» de çalışmay.
