12 yılğa mahküm etilgen Yalta "Hizb ut-Tahrir" davasınıñ mabüsi Vadim Siruk, Rusiyeniñ BaşqırtistanCumhuriyetindeki 2-nci izolâtorında еiş problemleri ve sıq suvuqlanma aqqında bildirdi. Bu aqta "Qırım birdemligi" onıñ apayı Anna Bogaçevağa atıf etip bildire.
Qayd etilgenine köre, şimdi Başqırtistanda suvuq, qar yağa, bu sebepten Siruk ve diger mabüsler sıq-sıq hastalana. Cezahanede mabüslerni qabul ete bilecek tiş ekimi de yoq.
Bundan ğayrı, cezahanede aş meselesi bar. Aile esas aşayt mallarını oña bermege tırışa, amma bunı tek üç ayda bir yapmaq mümkün.
"Biz Vadimge üç ayğa ilâc, vitamin ve aşayt berdik, olarnıñ arasında çoq kürdük de bar, teessüf ki, cezahanede aş pek yaramay. Yerli tükânlarda sebze ve meyvalar çoq degil, şunıñ içün vitaminlerni ayrı almaq kerek", — dep bildire Bogaçeva.
Siruk aftada altı kün tikiş tsehinde çalışa — yerli cermay şirketi içün urba tike.
Siruknı Rusiye quvetçileri 2016 senesi yaqaladı. Onı Rusiyede yasaq etilgen "Hizb ut-Tahrir" islâm siyasiy teşkilâtına alâqası bar olğanında qabaatladılar.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
