12 yılğa azatlıqtan marum etilgen "Qırım musulmanları" davasınıñ mabüsi Rustem Murasov Rusiyeniñ Vladimir şeerine avuştırılğanını bildirdi. Bu aqta ''Qırım birdemligi'' erkekniñ mektübineatıf etip yaza.
Qayd etilgenine köre, etap fevralniñ 17-nde başlandı. Murasov Novoçerkassk SİZO-sından davanıñ diger üç figurantı ile beraber çıqtı.
''Permde bizni ayırdılar. Meni vaqtınca IK-29 apishanesine, digerlerni ise doğrudan-doğru Perm SİZO-sına yolladılar. Añlağanıma köre, epimizni Vladimirge alıp keteler. Sağlığım yahşı, umumen er şey yahşı", - dep yazdı Murasov.
2021 senesi avgustnıñ 7-nde Qırımda Rusiye quvetçileri qırımtatarlarnıñ evlerinde birden beş tintüv keçirdi, bundan soñ faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında faal Zaur Abdullayev, Qırımnıñ Aqmescit rayonında Raif Fevziyev tutuldı.
"Qırım birdemligi" cemaat birleşmesi advokat Aleksey Ladinniñ malümatına atıf etip, yaqalanğan qırımtatarlar "terror teşkilâtınıñ teşkil etilmesinde ve iştirak etmesinde" şübeli sayıla, dep bildirdi.
Qırımtatar resurs merkeziniñ yolbaşçısı Eskender Bariyev bildirdi ki, 2023 senesi Qırımda uquq qoruyıcılar 173 yaqalav, 65 tintüv, 217 tevqif, 186 sorğu, em de adaletli mahkeme aqqınıñ 300-den ziyade bozuluvı ve sağlıq aqqınıñ 50-den ziyade bozuluvını qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
