2015 senesinden başlap işğal etilgen Qırımda Rusiye ordusında askerlik yapmaqtan vazgeçken qırımlılarğa qarşı 15 cinaiy ve tahminen 250 memuriy dava açıldı. Bu aqta Kreml kontrolindeki Qırımnıñ arbiy komissarı Oleg Yermilov aprelniñ 16-nda matbuat konferentsiyasında bildirdi, dep haber ete «RİA Novosti Krım» Rusiye haber agentligi.
Umumen, Yermilovnıñ malümatına köre, bu müddet içinde aman-aman 300 insan Rusiye ordusında askerlik yapmaqtan vazgeçmege tırışqan edi.
Qırımnıñ arbiy komissarlığı 2019 senesi baarinde 2,8 biñ qırımlını Rusiye ordusına askerlikke almağa planlaştıra. Çoqusı, 85%-ı, qomşu Rusiyeniñ regionlarında askerlik yapacaq.
Kyiv Rusiyeden işğal etilgen Qırım sakinlerini silâlı quvetlerine çağıruvını toqtatmasını talap ete. QMC prokuraturası qırımlılarnı Rusiye ordusında hızmet etüv içün celpname alğanda telefon ya da elektron poçta vastasınen muracaat etmege rica ete.
Ukrainadaki BM insan aqları monitoring missiyası bildirgenine köre, 2017 senesi eñ az 4800 Qırım sakini Rusiye silâlı quvetlerine çağırıldı. OSCE ABD işleri vaqtınca vekâletlisi Garri Kamiannıñ malümatına köre, 2018 senesi 5600 qırımlı Rusiye ordusına çağırıldı.
Qırım aq qorçalayıcı gruppasınıñ malümatına köre, Rusiyeniñ Qırım işğali başlağanından berli Rusiye 15 biñ qırımlını askerlikke çağırdı.
