Link açıqlığı

Saatnıñ esas haberi

5 yıl evelsi Qırımda qırımtatar faali Reşat Ametov hırsızlanğan edi. Onı ölü tapqanlar


Reşat Ametov
Reşat Ametov

5 yıl evelsi, 2014 senesi martnıñ 3-nde, Aqmescitte qırımtatar faali Reşat Ametovnı hırsızlağanlar. O, Qırım ükümetiniñ binası ögüne sahte «referendumğa» qarşı bir kişilik narazılıqqa çıqqan edi. Daa soñra onı ölü tapqanlar.

Bu künleri Ukrainadaki Rusiye elçihanesi ögünde aktsiya keçirildi. Onı «KrımSOS» cemaat teşebbüsiniñ faalleri öldürilgen Reşat Ametovğa bağışladı.

«Qırımda ilk ölüm Reşat Ametov olğanını epimiz hatırlaymız. İşğal etilgen Qırım tarihında ilk sefer insan hırsızlanğan edi. Amma o vaqıttan berli bir tahqiqat keçirilmey», – dep ayttı aktsiya vaqtında «KrımSOS» cemaat teşebbüsiniñ koordinatorı Tamila Taşeva.

«Işıq küreşçisi» Reşat Ametov. İşğalcilerniñ qollarında ilk qan (video)
Bekleñiz, lütfen

No media source currently available

0:00 0:01:58 0:00

2014 senesi martnıñ 3-nde saba Aqmescitniñ Maryino qasabasında yaşağan üç balanıñ babası, 39 yaşında Reşat Ametov evden çıqqan edi. Tuvğanlarına arbiy komissarlıqqa barıp, Ukraina ordusınıñ göñüllileri sırasına yazılacağını ayttı. Video kameraları onı, Rusiyeniñ Qırım işğaline qarşı Lenin meydanında Qırım ükümetiniñ binası ögünde bir kişilik narazılıq keçirgen kişini, qayd etti. Videoda körüne ki, Qırım «samooboronasınıñ» bir qaç vekili onı meydanda tutıp, maşinağa mindire.

Eki aftadan soñ Reşat Ametov Qarasuvbazar rayonınıñ Ortalan (Zemlâniçnoye) köyü yanındaki tarlada ölü tapıldı.

Erkekniñ cesedinde işkence izleri bar edi, başı şeritnen sarılğan edi, yanında ise qırçma tapılğan edi. Daa soñra çıqarılğan neticelerge köre, ölümniñ sebebi közüne saplanğan pıçaq yarası oldı.

Moskvanıñ kontroli altında bulunğan Qırım akimiyeti qırımtatar faalini elâk etkenleriniñ tapılması içün mukâfat berecegini vade etti. Lâkin faalniñ qatilleri ale daa tapılmadı.

2017 senesi Ukraina prezidenti Petro Poroşenko 2014 senesi baarde öldürilgen qırımlı Reşat Ametovğa Ukraina Qaramanı unvanını berdi.

Poroşenko Reşat Ametovnı «qırımtatar halqınıñ cesür oğlu, Ukrainağa ait Qırımsız yaşayışını tasavvur etip olamağan insan» dep adlandırdı.

BM insan aqları Yuqarı komissarınıñ idaresi öz maruzasında qırımlı Reşat Ametovnıñ öldürilüvini mahkemesiz idam dep adlandıra.

XS
SM
MD
LG