Rusiyeniñ Yuqarı mahkemesi "devlet hainliginen" qabaatlanıp, 11 yıl apis cezasına mahküm etilgen qırımlı İvan Yatskinniñ ükmüne qarşı berilgen temyiz talabını red etti. Bunı Facebookta advokat Nikolay Polozov haber etti.
"Temyiz talabına çoq ümüt etmedik. Rusiyede mahkeme çoqtan mustaqil institut degil, o icra akimiyetiniñ soqur ve söz diñlegen qoşumtısına çevirildi. Aynı zamanda İvan Yatskin ve diger ukrayin siyasiy mabüsleriniñ azat etilmesi oğrunda küreş devam ete", - dep yazdı Polozov.
Polozov Qırım.Aqiqatqa bildirdi ki, Rusiye Avropa insan aqları mahkemesiniñ qararlarını tanımaqtan red etkeni içün AİAM muracaat etilmeycek.
"İvan Yatskinniñ keysine kelgende, mudafaa tarafı BMT İnsan akları komitetine ve Halqara ceza mahkemesine muvafıq şikâyetler azırlay", - dedi o.
2021 senesi mayısnıñ 21-nde Rusiye nezaretinde olğan Qırımnıñ Yuqarı mahkemesi «devlet hainliginen» qabaatlanğan Qırım sakini İvan Yatskinge üküm çıqardı. Alla Hineviçniñ reisliginde qadılar kollegiyası İvan Yatskinni bir yıl sıñırlav ile 11 yıl sert apis cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
