Qırımda Rusiye tahqiqatı tarafından patlayıcı madde ve silâ saqlağanında qabaatlanğan qırımtatar faali Edem Bekirovğa ekimler bergen insulin yardım etmey.
Şu sebepten SİZOda tutulğan Bekirovnıñ qan şekeri yüksek olıp qala, yüregi ağırmağa başladı, dep tarif etti fevralniñ 15-nde Qırım.Aqiqat mühbirine advokat İslâm Velilâyev.
«Bugün SİZOda Edem Bekirovnı ziyaret ettim. O, sağlıq vaziyetini şikâyet ete. Qan basımı ve qan şekeri yüksek. Oña künde üç kere insulin berile. Şeker ilâclarını alğanda olar oña yardım ete edi – şekeri köterilmey edi. Bundan ğayrı, insulin berilgeni içün yüregi ağırmağa başladı ve nefes tarlığı ola. İnsulin, malüm olğanı kibi, yürekke tesir ete. Oturıp yuqlay, böyle daa raat», – dep añlattı advokat.
Şu sebepten imaye Bekirovğa berilgen ilâclarnıñ faydalı olğanından şübhelene.
«Bekirovğa berilgen insulinniñ faydalı olğanından şübhe bar. Başqaca aytacaq olsaq, hulâsa çıqaram – bu boş. İnsulin nasıl berilgenini añlatayım: o, qapuğa yaqınlaşa ve «aşlavdan» (mabüske aş berilgen küçük bir teşik – QA) oña insulin inesi urula. Bu şprits içinde ne olğanını bilmeymiz, amma faydasını körmeymiz. Ayağındaki yaranı aytsaq: o, qapanmay. Bütün ilâc, melem, bintlerni tuvğanları ketire. Sarğılavlarnı Özü yapa. Bint ve melem berilüvinde bir problem çıqsa, vaziyet daa beter olur», – dep qoştı Velilâyev.
İmaye, Bekirovnıñ tekrar tibbiy baquvdan keçmesi içün Aqmescit şeer hastahanelerinden birine çıqarıluvını talap etmege planlaştıra.
«Al-azırda onı şeer hastahanesine alıp ketip, endokrinologğa daa bir kere baqtırmalı, çünki qan şekeri yüksek. SİZOdaki tibbiy bölük hadimleriniñ aytqanına köre, nevbetteki tibbiy baquv hastahanede üç aydan soñ yapılmalı. Elbette, o qadar beklep olamaymız. Er kün tahqiqatçı ve SİZO reberligine şikâyet ve muracaat yazıp, eñ yaqın vaqıtta onı hastahanege alıp ketmege talap etecekmiz», – dedi advokat.
Rusiye cezalarnı yerine ketirüv federal hızmeti Bekirovnıñ alınen bağlı advokatnıñ beyanatını daa izaatlamadı.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Fevralniñ 6-nda Kyivdeki matbuat konferentsiyasında Edem Bekirovnıñ qızı Eleonora babasınıñ hastalıqları ölümine sebep ola, dep qorqqanını aydınlattı. Onıñ aytqanına köre, Aqmescit SİZOsında Bekirovğa kerekli tibbiy yardım kösterilmey.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Ukraina Tış işler nazirligi mahkemeniñ qararına qarşı «sert narazılıq» bildirdi.
Yanvarniñ 15-nde Bekirov Aqmescit SİZOsından Semaşko Cumhuriyet hastahanesiniñ endokrinologiya bölügine tibbiy teşkerüvge avuştırılğan edi. Yanvarniñ 18-nde Ukraina Yuqarı Radasınıñ insan aqları vekâletlisi Lüdmila Denisova Bekirov hastahaneden çıqarılıp, Aqmescit SİZOsınıñ mahsus blokuna yollanıldı, dep bildirdi.
