Qıtaynıñ Wuhan şeerinde bir hastahaneniñ baş ekimi koronavirus sebepçi olğan pnevmoniyadan öldi, dep bildire Qıtay devlet televizionına atıf etip Reuters agentligi. Ekim salı kınü, fevralniñ 18-inde saba keçindi. Lui Jiming ülkede bu hastalıqtan ölgen ilk hastahane reberi oldı, dep qayd ete Qıtaynıñ Baş televizionı, haber ete "Nastoyaşçeye vremâ".
Ekimniñ ölüm haberi daa evvel Çin Kommunist Partiyasınıñ "Jenmin Jibao" gazetasında çıqtı, lâkin soñradan beyanat silindi.
Qıtayda koronavirusqa oğrağanlarnıñ sayısı 70 biñni aştı. Tasdıqlanğan hasta sayısı 70 548 ola, 1770 insan can berdi, fevralniñ 17-sinde 2048 yañı hasta qayd etildi, bu raqam keçken künden 39-ğa daa yüksek ola. Ölgen daa 105 kişi aqqında da haber etile.
Yaponiya akimiyeti memleketniñ yalısında karantinde turğan Diamond Princess gemisinde daa 70 kişi hastalanğanını ilân etti, gemide hastalarnıñ umumiy sayısı 355 oldı.
ABD Tokio elçihanesiniñ malümatına köre, fevralniñ 16-nda eki çarter uçağı Yaponiyadaki gemiden amerikalılarnı alıp, ABDge uçtı. Memleketine kelip 14 kün karantinde qalacaq 340 amerikalı gemiden alınğanını bildireler. Koronavirusnen hastalanğanlar Yaponiyada qala.
Şimdi Qıtaydan ğayrı, aman-aman 30 memlekette 500 insan hasta oldı. Frenkistan, Gonkong, Filippinler ve Yaponiyada dört kişi öldi.
