ABD prezidentligine namzet Donald Tramp, saylavlarda ğalebe qazansa, 24 saat içinde Rusiyeniñ Ukrayinağa qarşı cenkini yekünlemek niyetinde olğanını tekrar bildirgen edi. Onıñ planı Kıyivge Moskva ögünde teslim olması içün basqı yapmaqtan ibaret, dep yaza The Washington Post.
Neşirniñ bildirgenine köre, Trampnıñ planı ile tanış olğan insanlarnıñ aytqanına köre, "o, şahsiy subetinde, Rusiyeniñ Ukrayinağa qarşı cenkini toqtatmaq içün, Kıyivge belli bir topraqlardan vazgeçmesi içün basqı yapa bilecegini bildirdi".
Böylece, kütleviy haber vastalarınıñ malümatına köre, Trampnıñ ğayesi "Ukrayinanı Qırım ve Donbasnı Rusiye nezaretine bermege teşviq etmekten ibaret", dep tarif etti Trump ve onıñ mesleatçılarınen bu meseleni muzakere etken adamlar.
The Washington Post mühbiriniñ aytqanına köre, Tramp, onıñ fikrince, em Rusiye, em de Ukrayina "yüzüni saqlap qalmaq isteyler, çıqış isteyler" ve "Ukrayinanıñ bazı qısımlarında insanlar Rusiyeniñ bir qısmı olmağa razı olur edi".
Trampnıñ saylav ştabı, The Washington Post haber etkenine köre, suallerge doğrudan cevap bermekni red etti.
Daa evel Trump, ABD prezidenti vazifesine ğayrıdan saylanılsa, Ukrayinadaki cenkni 24 saat içinde toqtatır, dep bildirgen edi. Onıñ aytqanına köre, kabinetinde Ukrayina ve Rusiye prezidentleri Volodımır Zelenskıy ve Vladimir Putinni toplaycaq, kabinetten ise olar barışıq añlaşmasınen çıqacaq. Bu plannıñ tafsilâtlarını Trump aydınlatmay.
Evel Zelenskıy NBC News içün bergen intervyüsında Trampnı Ukrayinağa davet etti. O, sabıq amerikalı liderniñ 2024 senesi saylavlarda ğayrıdan saylanılsa, "Ukrayinada cenkni bir künde bitirecegini" vade etkenine cevap berdi.
Ukrayina devletiniñ yolbaşçısı qayd etti ki, o, Trampqa "24 daqqa içinde" cenkni bitirip olamaycağını añlata bile, çünki Rusiye diktatorı Vladimir Putinnen diplomatiya imkânsızdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
