İyünniñ 20-den avgustnıñ 5-ne qadar keçirilgen marafonnıñ 14 iştirakçisi qırımtatar tilinde 500-den ziyade Wikipedia maqalesini mükemmelleştirip ve yazdı. Bu aqta «Vikimedia Ukrayina» cemaat teşkilâtı bildirdi.
«Bu qırımtatar tili bölügine qoşulğan müim bir isse, bu da internette bu tilde serbest bilgilerni populârlaştırmaq içün siltem olacaq ve ana tilinde laf etkenler ve kelecek nesiller içün mündericeniñ miqdarını ve keyfiyetini arttırır, em de qırımtatar tiliniñ talebeleri içün faydalı olur», – dep qayd etti teşkilâtnıñ vekili Yelena Vinsent.
Qırımtatar Wikipediası 16 yıldan ziyade çalışmaqta ve anda 30 biñge yaqın maqale bar. Lâkin ilâvelerni talap etken müim mevzular bar – hususan, daa yeterli derecede aydınlatılmağan esas añlamlar, em de Qırım ve umumen Ukrayina aqqında maqaleler.
2021 senesi olıp keçken birinci marafon devamında qırımtatar tilinde 300-ge yaqın maqale mükemmelleştirildi ve yazıldı. Bu sene bu netice daa yüksek oldı: 14 iştirakçi 517 maqale yazıp mükemmelleştirdi.
Marafonnıñ neticesi – Ukrayina, Qırım, qırımtatar medeniyeti, ananeleri ve tarihına bağışlanğan 250 maqale. Ananeviy qırımtatar örnegi, Lvivdeki qırımtatar merkezi, XX asırnıñ başında yaşağan qırımtatar ocası Asan Aciumerov, Qırım astrofizika observatoriyası ve diger mevzularğa bağışlanğan maqaleler peyda oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
