ABD Devlet departamenti İstanbuldaki Rusiye vekillerinen muzakerelerniñ neticeleri aqqında haber etti.
ABD, qayd etilgenine köre, «bank ve añlaşma hızmetlerinden faydalanmaq, em de Moskvadaki ABD elçihanesinde kadrlar seviyesinistabil ve turğun temin etmek kerekligi aqqında havflı olğanını bildird».
«Konstruktiv muzakereler vaqtında eki taraf eki taraflı missiyalarnıñ işini stabilleştirmek içün tam başlanğıç adımlarını belgiledi», – dep qayd etile müessiseniñ matbuat relizinde.
Devlet departamenti bildirgenine köre, Amerika eyyetiniñ başında ABD devlet kâtibi yardımcısınıñ muavini, Rusiye eyyetiniñ başında ise Tış işler nazirligi Şimaliy atlantik departamentiniñ müdiri Aleksandr Darçiyev edi. Olar «bu meselelerde eñ yaqın vaqıtta körüşmege» añlaşqanlar. Kün ve yeri şimdilik belli degil.
ABD ve Rusiye vekilleri fevralniñ 18-nde Saudiy Arabistanda körüşti. ABD Devlet kâtibi Marco Rubio Washington ve Moskva elçihanelerniñ eski hadim sayısını ğayrıdan tiklemege añlaştılar, dep bildirdi. Rusiye Tış işler naziri Sergey Lavrov üç vazife belgilendi, dep haber etti: eki memleketniñ elçilerini tayin etüv, Ukrayina muzakereleri içün vekillerini tayin etüv ve Rusiye ve ABD işbirliginiñ «bütünley» yañıdan başlatılması içün şaraitlerniñ yaratıluvı.
ABD 2021 senesi Rusiye diplomatlarınıñ memlekette bulunmasını üç yılnen sıñırladı. Yigirmi yedi diplomat qorantalarınen beraber Amerika Birleşken Devletlerinden 2022 senesi yanvarniñ 30-na qadar, daa 28 kişi 2022 senesi iyünniñ 30-na qadar çıqmaq kerek edi. Buña cevap olaraq Rusiye Moskvada üç yıldan ziyade çalışqan ABD elçihanesiniñ hadimlerini memleketni terk etmege mecbur etti. 2024 senesi iyün ayında ABD Rusiye viza merkezini qapatıp, Rusiye diplomatlarını bergi tölemek imkânından marum qaldırdı.
Rusiye ABDni Rusiye diplomatik ve konsullıq temsilciliklerine qarşı duşmanca areket etken devletler cedveline qoştı. Bu cedvelde olğan memleketlerniñ diplomatik missiyalar işke alğan rusiyeli hadimler sayısı sıñırlana. Böylece ABD Moskva, Vladivostok ve Yekaterinburgda Amerika diplomatik temsilciliklerinde çalışqan 182 hadimni işten boşatmağa mecbur edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
