Rusiye nükleer obyektlerine ateş açıp, bütün dünyanı telükege oğrata, onı toqtatmaq kerek, dep bildirdi Ukrayına prezidenti Volodımır Zelenskıy, Rusiye ordusınıñ Cenübiy Ukrayına atom elektrostantsiyasına açılğan ateşni izaatlap.
«Mıkolayıv vilâyeti. Gece Cenübiy Ukrayına atom elektrostantsiyasından 300 metr mesafede raketa tüşti. Elektrik ağı qısqa vaqıtqa söndürildi. Atom elektrostantsiyasındaki binalarda pencereler zarar kördi. İşğalciler kene ateş etmege istedi, amma atom stantsiyası ne olğanını unutqanlar. Rusiye bütün dünyanı telükege oğrata. Keç olmağanda onı toqtatmaq kerek», – dep yazdı Zelenskıy Telegramda sentâbrniñ 19-nda.
Bugün «Energoatom» Ukrayına devlet şirketi Rusiye ordusı sentâbrniñ 19-na keçer gecesi Cenübiy Ukrayına atom stantsiyasına raketalar endirdi. Berilgen malümatqa köre, raketa nükleer reaktorlarından 300 metr mesafede tüşti. Darbe dalğası atom elektrostantsiyasınıñ binasına zarar ketirdi, 100-den çoq pencere qırıldı. Cenübiy Ukrayına energokompleksine kirgen Aleksandr gidroelektrostantsiyasınıñ gidroagregatlarından biri söndi. Üç yüksek voltli elektrik hattı söndi.
«Energoatom» Cenübiy Ukrayına atom elektrostantsiyasınıñ üç energobloku çalışa, dep qoştı. Hadimler arasında zararlanğanlar yoq.
Ukrayına akimiyeti Rusiye quvetlerini işğal etken Zaporijjâ atom elektrostantsiyasına ateş açqanında qabaatladı, Rusiye tarafı qabaatlavlarnı red etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
