Ukraina prezidenti Volodımır Zelenskıynıñ koronavirus yuqunçı qayd etildi, dep bildire Prezident ofisi.
«Devlet yolbaşçısınıñ alı güzel ve o, vazifelerini uzaqtan yapmağa devam etecek. Bağ içün bütün kerekli aletleri ve donatmaları olacaq. Prezident ofisiniñ reberi, muavinleri ve Ofis hadimleri PCR testlerini daimiy şekilde bere», – dep aytıla haberde.
Prezident Zelenskıy Telegram kanalında 37,5 sıcağı bar, dep haber etti.
«Alım yahşı. İzolâtsiya olıp çalışmağa devam etmege söz berem. Çoqusı COVID-19-nı yeñe. Men de bundan keçecem. Er şey güzel olacaq», – dep qayd etile haberde.
Yazda yañı koronavirus yuqunçı Olena Zelenskayada qayd etilgen edi. O vaqıt Ukraina prezidenti özüni izolâtsiya etken edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
