Ukrayina prezidenti Volodımır Zelenskıy, şimdilik Ukrayina Silâlı Quvetleri arbiy tehnikada alâ Rusiyeniñ ordusından keri qalğanı içün qarşı ücümge keçip olamağanını bildirdi.
"Pek çoq asker ölecek, menim prioritetim ise adamlardır", - dedi Zelenskıy Financial Times gezetiniñ matbuat konferentsiyası vaqtında.
Aynı zamanda, Ukrayina prezidenti, bu cenkniñ taraflarnıñ şimdiki noqta-i nazarlarında qalacağı ile beraber "soñra" bitmesine razı olmağanını qayd etti. Onıñ fikrince, "cenkte yeñmek" kerek. O, rus ordusınıñ fevralniñ 24-deki mevzilerine çıqarılmasını ara ğalebe, "bütün topraqlar üzerinde tam suverenitetniñ tiklenilmesini" ise niaiy ğalebe kibi qıymetlendire. Ukrayina prezidenti dedi ki, aytışuvlarğa azır, amma şahsen Vladimir Putin ile.
Zelenskıy, Ğarp memleketlerini Ukrayinağa silâ teslimatını arttırmağa ve Rusiyege qarşı sanktsiyalarnı quvetleştirmege, şu cümleden energiya menbası teslimatına tam embargo tatbiq etmege çağırdı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
