Ukraina prezidenti Volodımır Zelenskıy TİN diplomatlarını Rusiye tarafından işğal etilgen yarımadanıñ işğalden azat etüv Qırım platformasına çetel memleketlerni faal celp etmege çağırdı.
Bunı o, dekabrniñ 17-nde Ukrainanıñ çetel diplomatik müessiseleri reberleriniñ video konferentsiyası çerçivesinde keçirilgen “Ukraina tış siyasetiniñ strategik prioritetleri” adlı umumiy sessiyası vaqtında ayttı.
“Ukrain Qırım yarımadasınıñ azat etilüvi oğrunda ilerideki iş müim qala. Bugünde bu meseleni halqara kün tertibine qaytardıq, dep ayta bilem. Qırımnı işğalden azat etmek içün halqara küçlerni birleştiryuv teşebbüsimiz olğan Qırım platforması kettikçe ziyade aşkâr ola. Bu teşebbüske endi Avropa ve Şimaliy Amerikada qoltuttılar ve men sizni bu platformağa diger memleketlerni celp etmek içün faal çalışmağa çağıram", – dedi Zelenskıy.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
