Böyle bir beyanatnı o, sovet rejimi tarafından qırımtatarlarnıñ sürgün etilmesiniñ 80-inci yıllığında yaptı.
"Seksen yıl evelsi insanlarnıñ ayatına qarşı eñ deşetli cinayetlerden biri yapıldı: sovet akimiyeti qırımtatar halqını sürgün etti. Em balalar, em de büyükler — er kes. Bir qaç kün içinde. Acımağan. Başqasınıñ toprağına. Yalanlarnen beraber. Şimdilik elâk olğanlarnıñ tam sayısı belli degil — eñ azından, qırımtatar halqı bu sürgünlik neticesinde üçte birini ğayıp etti. Ve adamlar evlerine tek onlarnen yıl keçken soñ qaytıp oldılar", — dedi Zelenskıy.
O şunı qayd etti ki, "cinayetçi cezalandırılmadı". "Rejim mahküm etilmedi. Keçken asırnıñ insan yaşayışına sayğısızlıq ve devlet zorbalığı bizim zamanımızda ğayrıdan peyda oldı. On yıl evelsi eski yamanlıq — genotsid yamanlığı — şeklini yañarttı, mefküreviy örtüni deñiştirdi, amma öz mahiyetini ve maqsatlarını deñiştirmedi ve Qırımdan başlap Ukrayinağa qarşı da aynı şekilde areket etti, — dep qayd etti ukrain lideri.
"Bizim umumiy tarihiy borcumız — Rusiyeniñ ücümlerine halqımıznıñ tirenüvi, devletimizniñ işğalci zulumı üzerinde ğalebesi ve 2014 senesinden başlap Rusiyeniñ bu cenkte yapqan cinayetleri içün adaletli cezası ile cevap bermek. Şimdi Ukrayina, halqımız ve toprağımızda olıp keçkenler aqqında aqiqatnı qorçalap, ayatları yoq etilgen er kesniñ hatırasını ürmet etemiz ve insanlıq küçüni — kelecek nesillerimizniñ küçüni tasdiqlaymız", — dep yekünledi Zelenskıy.
Mayısnıñ 18-nde, cumaertesi künü, sovet rejimi tarafından qırımtatarlarnıñ Qırımdan sürgün etilmesine 80 yıl tola. Bu künü Ukrayinada devlet seviyesinde qırımtatar halqı genotsidi qurbanlarınıñ hatıra künü qayd etile.
1944 senesi bu künü sovet rejimi Qırım yarımadasından qırımtatar halqını Orta Asiya ve Ural rayonlarına sürgün etmege başladı. Umumen tahminen 200 biñ insan sürgün etildi. Olarğa 40 yıldan ziyade Qırımğa qaytmaq yasaq etildi. Farqlı malümatlarğa köre, sürgün etilgen vatandaşlarnıñ yarısından ziyadesi sürgünlik yolundaki zorbalıq, açlıq, suvuq ve hastalıqlardan elâk oldı.
Ukrayina Yuqarı Radasınıñ qararına binaen, mayısnıñ 18-i Qırımtatar halqı genotsidi qurbanlarınıñ hatıra künü olaraq ilân etildi.
Adet üzre mayıs 18-de Ukrayinada qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçirile, lâkin bu sene, keçken seneleri kibi, bütün kütleviy tedbirlerniñ keçirilmesine Rusiyeniñ arbiy istilâsı ve Qırım işğali tesir ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
