Sentâbrniñ 1-nde Ukraina prezidenti Volodımır Zelenskıy Amerika devlet başı Joseph Biden ile körüşüvni Qırım ve Donbas mevzusından başlamağa istey.
Bunı o, salı künü jurnalistlernen laf etkende bildirdi, dep haber eteUNN.
«Tek sual-cevap olmaycaq. Körüşüvimiz pek ciddiy, laqırdımıznıñ bir qaç yönelişi olacaq... Angi bir sualden başlaycağımıznı aytmaq qıyın. Bir çoq şeyge yalıñız cevap degil, fikirler eşitmek isteymiz», – dedi Zelenskıy.
Aytışuvlar vaqtında "Normandiya formatı", Qırm ve Donbas meseleleri köterilecekmi, yoqmı sualge: "Bellesem, bundan başlaycaqmız", dedi.
Evel, Ukraina ombudsmanı Lüdmila Denisova, Volodımır Zelenskıy Joseph Biden ile körüşüvde Donbas ve Qırımda esir etilgen ve bellisiz ğayıp olğan ukrainlerniñ cedvelini berecegini bildirgen edi.
Zelenskıy Vaşingtonğa avgustnıñ 30-nda kelip çıqtı. Anda üç kün bulunacaq. Artıq ukrain delegatsiyasınıñ vekilleri ile beraber bir qaç körüşüv keçirdi. Avgustnıñ 31-nde, Ukraina ve ABD strategik mudafaa aqqında çerçive añlaşmanı imzalağanını ayttı. Sentâbrniñ 1-nde ise Ukraina ve ABD devlet başları arasında körüşüv olıp keçmek kerek.
