Ukraina prezidenti Volodımır Zelenskıy, yanvarnıñ 2-nde ABD lideri Jo Biden ile laf etecegini bildirdi. Bu aqta, o, Twitter saifesinde yazdı.
Zelenskıy, "Ukrainasız Ukraina aqqında iç bir şey" printsipini hatırlattı. Buña da köre, halqara seviyedeki Ukraina ile bağlı qararlar Kyiv ile kelişilmeli.
"Ukraiada sulh ve Avropada telükesizlik olması içün adımlarımız aqqında kelişmek maqsadınen bazar kününe ABD prezidenti ile nevbetteki aytışmalar planlaştırılğan", - dep yazdı prezident.
Jo Biden müdiriyetinde, prezident memleketiniñ Ukraina topraq bütünligine ve suverenitetine destegini tasdıqlamağa niyetinde olğanını bildirdiler.
Cumaaqşamı, dekabrniñ 30-nda, aqşam Rusiye ve ABD prezidenti Vladimir Putin ve Joe Biden telefonda laf ettiler. Eki prezidentniñ telefon subeti 50 daqqa devam etti.Subet Ukraina etrafındaki vaziyetniñ kerginleşmesinen bağlı edi.
Küzde kütleviy haber vastaları istihbaratnıñ malümatına esaslanıp, Ukraina sıñırında Rusiye ordusı toplana, dep bildirdi. ABD ve Ğarp memleketleri Moskva silâlı ücüm azırlay, dep tahmin etti. Kreml bu laflarnı inkâr etip, ABD ve NATOdan telükesizlik kefaletlerini talap etti – hususan, NATOnı şarqqa kenişletmemek ve eski sovet cumhuriyetlerini arbiy ittifaqnıñ yañı azaları sırasına almamaq.