Ukrayina devlet başı Volodımır Zelenskıy gece ücümini izaatlar eken onı Ukrayinanıñ noyabrniñ 25-nde Açlıq qurbanlarını añması ile alâqalandırdı.
"Açlıq soyqırımınıñ qurbanları añılğan kününiñ gecesinde 70-ten çoq "Şahed". Añlı terror eylemi. Bu vaqıt edi. Rusiye reberligi öldüre beleceginden ğurur duya", - dep bildirdi o.
Zelenskıynıñ sözlerine köre, Ukrayina "ava mudafaasını quvetleştirmek ve dünyanı Rusiye terrorına qarşı mudafaada birleştirmek" içün çalışmağa devam etecek.
"Terrorcı memleket yutquzmalı ve yapqanı içün cevap bermeli", - dep qoştı o.
Noyabrniñ 25-ne keçken gece Rusiye ordusı "Şahed" tipi kamikadze pilotsız uçaqlarnı qullanaraq Ukrayinağa kütleviy ücüm kerçekleştirdi. Ukrayina Silâlı Quvetleriniñ Ava quvetleri Rusiye 75 dron qullanğanını ve olarndan 71 urıp tüşürilgenini bildirdi.
Ücümniñ esas yönelişleri Kıyiv ve Kıyiv vilâyeti edi. Ava telükesi signalı 6 saat devam etti. Ücüm neticesinde Kıyivde beş adam zarar körgen, olarnıñ arasında 11 yaşındaki bir bala, dep haber etti şeer başı Vitaliy Kliçko.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
