Ukrayina prezidenti Volodımır Zelenskıy aprelniñ 11-nde Cenübiy Koreya parlamentine maracaat etkende, evel Cenübiy Koreya Mudafaa Nazirliginiñ red etkenine baqmadan kene de Rusiyege qarşı küreşmek içün öldürici silâlar bermege çağırdı.
"Ukrayinanıñ arbiy destekke, şu cumleden uçaqlar ve tanklarğa ihtiyacı bar. Cenübiy Koreya Ukrayinağa yardım etip ola. Cenübiy Koreyanıñ Rusiyeniñ tankları, gemileri ve raketalarından qorçalay bilgen mudafaa sistemaları bar. Cenübiy Koreya Rusiye ile cenkleşmege bizge yardım etse, minnetdar olurmız", - dep qayd etti Zelenskıy.
Evel, aprelniñ 11-nde Cenübiy Koreya Mudafaa nazirliginiñ temsilcisi Bu Sın Çan nazirlik Ukrayinanıñ talabını red etkenini bildigren edi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
