Yañı tayin etilgen Ukrayına mudafaa naziri ABDde yahşı bileler ve ürmet eteler, dep bildirdi ABD Devlet departamentiniñ Ukrayına meseleleri mahsus vekili (2017-2019 s.) Kurt Volker Kyivde.
Volker cenk vaqtında Ukrayına Mudafaa nazirliginiñ reberliginde olğan deñişmeler aqqında sualge demokratiyada memurlar deñişe, dep cevap berdi.
«Demokratiyada insanlarnıñ vazifeleri deñişe. Nazirler şurasınıñ azaları bar, olar kelip keteler, demokratik memleketlerde böyle ola. Rusiyede olğanı kibi olmamalı, çünki anda birisi ketse – ya buhran olur, ya da bir şeyniñ işareti. Bu adiy şey. Şunıñ içün nazir deñişe, dep qasevetlenmedim», – dedi Kurt Volker.
O, artıq sabıq olğan Ukrayına mudafaa naziri Oleksiy Reznikov aqqında da ayttı. Onı tanıylar, pek semereli, onı pek seveler, dep ayta. Em Ğarpta, em Birleşken Devletlerde yapqan işi içün teşekkürler.
Kurt Volker yañı tayin etilgen Rustem Umerov aqqında aytıp, «onı da Birleşken Devletlerde bile ve ürmet eteler. Yañı tayin etilgen insannıñ semereli işbirligi yapa bilecek biri olğanı quvandıra», dep qayd etti.
Sentâbrniñ 7-nde Ukrayına prezidenti Volodımır Zelenskıy Ukrayına mudafaa naziri Rustem Umerovnı taqdim eti.
Ukrayına Yuqarı Radası sentâbrniñ 6-nda Rustem Umerovnıñ mudafaa naziri vazifesine tayin etilmesine qoltuttı.
Oleksiy Reznikov Volodımır Zelenskıy Ukrayına mudafaa nazirini deñiştirmek qararı aqqında aytqan soñ istifağa ketti.
Bu qarar müessisedeki ve nazirniñ emrinde olmağan arbiy komissarlıqlar sistemasındaki qabarcılıq qavğalarından soñ seslendirildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
