Boşnıñ 13-ne keçer gecesi Ukrayin pilotsız uçaqları Rusiyeniñ Volgograd şeerine ücüm etti. Region gubernatorı Andrey Boçarov, uçucısızlarnıñ urulması neticesinde Volgogradnıñ cenübiy sanayı zonasında ve onıñ civarındaki territoriyada lokal yanğınlar qayd etildi, dep bildirdi.
Boçarovnıñ aytqanına köre, ücüm neticesinde dört işçi elâk oldı, daa ekisi hastahanege alındı.
Astra rusiye telegram kanalınıñ bildirgenine köre, uçucısız uçaqlar "Lukoyl" şirketiniñ Volgograd cermay zavodına ücüm etti. Bu Rusiyeniñ eñ büyük cermay zavodlarından biridir. Anda yanğın çıqtı. Şaatlarnıñ fotoresimlerinde birden bir qaç yanğın noqtası körüne.
Ukrayinanıñ "Exilenova+" ve "Supernova+" nezaret leyhaları haber etkenine köre, cermay zavodına ücüm etilgen soñ şeerde benzin stansiyalarında nevbetler peyda oldı.
Boşnıñ 13-ne keçer gecesi Rusiyeniñ Rostov vilâyetine de ücüm etildi. Rostov-na-Donu şeerinde bir insan zarar kördi, beş çoq qatlı ev zarar kördi, dep bildirdi region gubernatorı Yuriy Slyusar. Rusiye Federatsiyasınıñ Kursk vilâyetinde, gubernator Aleksandr Hınşteynniñ aytqanına köre, soñki künler devamında Ukrayin ücümleri neticesinde bir insan zarar kördi.
Ukrayina akimiyetiniñ temsilcileri, eger Rusiye Ukrayina energetik obyektlerine ücüm etmekten vazgeçse ya da ABD ve ortaqları Ukrayinanı Rusiye ballistik raketalarına qarşı küreşmek içün yeterli sayıda Ava mudafaası sistemaları ve silânen temin etse, Rusiyedeki cermay zavodlarına ücümlerni toqtatmağa azır olğanını defalarca qayd etken edi.