Rusiye Federatsiyasında mahküm etilgen qırımlı faal Vladlen Abdulkadırovğa Rusiye apishanesinde kerekli tibbiy yardım kösterilmey. Beli pek ağıra, sağ ayağı tutula, apishane ekimi bergen ineler yardım etmey ve menfiy tesirleri ola.
Bu aqta Abdulkadırovnıñ apayı Gülzar «Qırım birdemligi» cemaat birleşmesine haber etti.
«Başı pek ağıra, tahikardiya bar ve soñki inelerni yaptırmadı. Alını tibbiy bölükke bildirdi, amma anda bir şey aytmadılar», – dep tarif etti Gülzar.
Onıñ bildirgenine köre, Abdulkadırov çoq yürip ya da turıp olamay ve bir vaziyette uzun vaqıt qalamay.
Rusiyeniñ Yelts şeerindeki apishanege kelgende Abdulkadırovğa rentgen yapılıp, cerrahqa yollandı. Cerrah nevrolog baqsın, dep tevsiye etti – o vaqıttan berli dört ay keçti, amma ekim öyle de baqmadı. Gülzar Abdulkadırova sırt ağrısı quyuldıq alâmeti ola, dep tahmin ete.
Ukrayına prezidentiniñ Qırım Muhtar Cumhuriyetinde daimi vekili Tamila Taşeva Qırımda 45 Rusiye siyasiy mabüsiniñ hronik hastalıqları bar, 21-i acele tibbiy yardımğa muhtaç, dep bildirdi.
2022 senesi mayısnıñ 12-nde Rostov-na-Donudaki Cenübiy okrugınıñ arbiy mahkemesi qırımtatarlarnı «Hizb ut-Tahrir» teşkilâtına alâqası bar olğanında qabaatladı. Bilâl Adilov, Tofik Abdulgaziyev, Vladlen Abdulkadırov, İzzet Abdullayev ve Mecit Abdurahmanov umumen 62 yılğa azatlıqtan marum etildiler.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
