Rusiyedeki Vladivostok şeerinden ilhaq etilgen Qırımğa iyülniñ 11-inde yolda 10 saat keçirecek uçaq çıqtı, bildire Vladivostok ava limanınıñ matbuat hızmeti.
Qayd etilgeni kibi, "Biblio-Globus" turist operatorınıñ sımarışı ile "Rossiya" ava şirketi Qırım ve rusiye Primoryesi arasında ava alâqasını açtı. Uçuşlar aftada bir kere - cumaertesi künleri olacaq.
Aqmescit ava limanınıñ onlayn cedvelindeki malümatqa köre, bu uçaq Aqmescitke saat 12:31 kelip çıqtı.
Hatırlatayıq, "Rossiya" ava şirketi iyül 5-inde Habarovsktan Qırımğa uçuşlarnı başladı.
Bundan evel Aqmescit ava limanı, koronavirus pandemiyasından sebep, 2020 senesi mayıs ayında 2019 yılnıñ aynı müddetine köre yolcularnıñ sayısı 90%-ğa azlaşqanını bildirdi.
İyün 15-inden berli yarımdada özüni izolâtsiya etv rejimi toqtatıldı.
2014 senesi mart ayında Rusiye Qırımnı işğal etkeninden soñ, Ukraina akimiyeti qararınen Qırım ava limanları qapatılğan edi. Anda ve andan yapılğan er uçuş Ukraina qanunları ve halqara qaideleriniñ bozulıvı sayıla.
