Rusiye prezidenti Vladimir Putin, Qırımda yeterli qadar tatlı suv bar, dep saya. Akimiyet ise al-azırda artezian quyuları ve çoqraqlarınıñ azırlanuvı ile oğraşa. Bu aqta o, dekabrniñ 17-nde matbuat konferentsiyası vaqtında ayttı.
“Şimdi geologik keşifler keçirile… Kaptajlardan suvnıñ qısmı yönetile ve ümüt etem ki, yaqın vaqıtta Aqyar suv kıtlığını is etmeycek… Qırımda yeterli qadar yahşı tatlı suv yedekleri bar, mesele şunda ki evel bunen bir kimse oğramağan (yerastı çoqraqlar keşif etilmedi - QA)”, - dedi Putin.
Meseleniñ al etüv yollarında biri tatlılaştıruv deyler, amma Putin, böyle bir şeyni tek “muayen yerlerde” yapmaq mümkün, dep saya. Onıñ sözlerine köre, “bolge reberleri tatlılaştıruvnı semeresiz” sayalar.
“Qırım içün daa yanılıq bar, mütehassıslarıñ bildirgenine köre, Qırımğa yantayğan akvatoriyalarda, Azaq deñizi tübünde yahşı suv yedekleri bar, meseleni al etecekmiz, para ayırıla”, - dep qoştı o.
Rusiye baş nazir muavini Marat Husnullinniñ aytqanına köre, Moskva sovetler zamanında olğan Qırımdaki yerastı suvlarınıñ yedekleri aqqında malümatnı qullana. Yañı raqamlar Aqmescit ihtiyacları içün yañı quyularnıñ qazıluvı bitken soñ, yılnıñ soñunda aydınlatılacaq, dep vade eteler.
Onıñ malümatına köre, «Rosgeologiya» yılnıñ soñuna qadar yarımadada 30 quyu qazmagha planlaştıra. Husnullinniñ aytqanına köre, 20 danesi suv ağlarına suv berip başlaycaq.
Husnullin yarımadada suv qıtlığı qırılılarnıñ «hırsızlığınen» bağlı, dep ayta.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
