Sabıq siyasiy mabüs, qırımlı faal Volodımır Baluh, sentâbr 7-sinden 8-ine gece köteklengeninden soñ Kyiv hastahanesiniñ reanimatsiyasında "stabil ağır alda" yata. Bunı ekimlerge atıf etip Ukraina Yuqarı Radasınıñ deputatı İrına Ğeraşçenkonıñ bildirdi.
"Hasta devamlı olaraq ağırdır. Volodâ ihtiyacı olğan er şeynen temin etildi. Bugün meşur neyrocerrahlar, hususan professor Nikolay Polişçuk davet etildi ve qoşma konsultatsiyalar içün Volodımırnı baqtı. Ekimler sağ olsun, yahşılıqqa ümüt etemiz, tedaviylenmesi içün dua etemiz", - yazdı Facebookta Geraşçenko.
Ğeraşçenkonıñ daa evel aytqanına köre, Baluhqa ameliyat yapıldı ve reanimatsiyağa avuştırıldı. Onıñ aytqanına köre, qafa-miy yarası bar. Daa soñra Baluh aqcigerni suniy avalandıruv apparatına bağlandı.
Baluh köteklengenini Oleg Sentsov haber etti. Onıñ malümatına köre, faal sentâbrniñ 7-nden 8-ne keçer gecesi köteklendi. Ağır alda hastahanege alındı – qolu ve köpürçik kemigi sındırıldı.
Kiyv politsiyasınıñ malümatına köre, qırımlı 10-15 kişinen «Gidroparktaki» qavelerden birinde raatlanğan edi. Soñki sefer onı yarı gecede körgenler. Uquq qoruyıcılar Ukraina Ceza kodeksiniñ 187-inci maddesiniñ 4-ünci qısmına istinaden (aydutlıq) cinaiy tahqiqat başlattı.
Ukraina prezidentiniñ ofisi qırımlığa yapılğan ücüm sebebinden qasevetlengenini bildirdi.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
