Viyananıñ merkezinde noyabrniñ 2-nde aqşam kimligi belli olmağan insanlar sinagoga yanında ateş açtı, dep bildire Kronen Zeitung neşiri.
Şaatlar ateş çoq oldı, dep bildire. Neticede yedi insan elâk oldı, daa dört kişi yaralandı, dep haber ete Azatlıq Radiosı.
Politsiya rayonnı sarıp aldı ve cinayetçilerni tuta. Olarnıñ sayısı ve yapqanlarınıñ sebebi şimdilik belli degil. Politsiya terror ücümi olğanını inkâr etmey.
Kronen Zeitung yazğanına köre, tasdıqlanmağan malümatqa köre, ücüm etkenlerden biri özüni patlayıcı bağlanğan quşaq vastasınen patlattı. Kurier neşiriniñ malümatına köre, sinagoga ücüm maqsadı degil edi.
Hatırlatamız, keçken afta Frenkistanda oktâbrniñ 29-nda Nice ve Avignonda olğan ücümlerden soñ eñ yüksek terror telükesi ilân etildi.
Frenkistanda Parij yaqınlarında oca Samüel Pati öldürilgeninden eki aftadan soñ ücümler oldı. Oca derste Muhammed peyğameriniñ karikaturalarını kösterdi. Öldürüvden şübheli olğan kişi Moskvalı etnik çeçen Abdullah Anzorov ocanı peyğamberni aqaretlegeni içün «idam etti», dep ayttı.
Frenkistan prezidenti Emmanuel Macron ücümni «islâm terror ücümi» dep adlandırıp, Frenkistan cumhuriyetiniñ lâdiniy qıymetlerini radikal islâmdan qorumağa çağırdı. Makronnıñ lafları bazı musulmanlarnıñ açuvlanmasına ve narazılıq bildirmesine sebep oldı.
