Mahsus Qırım.Aqiqat içün
Roskomnadzor, Rusiye Federatsiyası Baş prokuraturasınıñ talabınen Ukrainanıñ vaqtınca işğal etilgen topraqlarnıñ reintegratsiya nazirliginiñ saifesini Rusiyede blok etti. Müessise matbuat hızmetiniñ malümatına köre, bunıñ manaçığı Qırım ve Donbasta koronavirus qırğınlığınen bağlı kerçek vaziyetniñ saqlanmasına dair malümat oldı. Amma, elbette, bu sebep degil, tam bir manaçıq. Sebep ortada, onı körmeyip keçmege kerekmey.
Müessise saytınıñ açıluvı bunı hatırlata: Qırım ilhaqı – ancaq işğalden reintegratsiyağa qadar bir müddet
Ğaliba, Reintegratsiya nazirliginiñ saytında Qırım ve Donbasnıñ olması sebep ola. Ebet, bu «Minsk esnası nazirligi degil». Bu müessiseniñ tek qurulışı Ukrainanıñ anayasa mevamını aks ete – Rusiye resmiy şekilde istemegen tek Donetsk ve Lugansk vilâyetleriniñ ayrı rayonları degil, amma Rusiye halqara (ve öz) uquqına zıt bir şekilde ilhaq etken Qırım topraqları da işğal etildi.
Delillermi? Olar da ortada. Ukraina nazirliginiñ saytı – Rusiye blok etken Ukraina devlet qurulışınıñ ilk saytıdır. Hatırlamaq kerek ki, diger memleketlerniñ de – Moldova Cumhuriyetiniñ, Gürcistannıñ – Rusiye işğal etken topraqlarnıñ reintegratsiyasınen oğraşqan müessiseleri bar. Amma on yıllarnen olarğa qarşı bir iddia olmadı, olarnıñ internet temsilcilikleri Rusiye Federatsiyasında açıq. Ne içün? Şunıñ içün. Rusiye Pridnestrovye, Abhaziya ve Cenübiy Ösetiya topraqlarını resmiy şekilde istemey. Bular – onıñ müstemlekeleri, imayesi altındaki yerler, amma Rusiye degiller. Donbasnıñ «halq cumhuriyetleri» de öyle.
Qırım – ğaliba, Kremlniñ pandemiya vaqtında, cermay fiyatları tüşkende ve Rusiye iqtisadiyatı yoq olsa bile soñunace tutacaq yeri
Qırım ise… Qırım – ğaliba, Kremlniñ pandemiya vaqtında, cermay fiyatları tüşkende ve Rusiye iqtisadiyatı yoq olsa bile soñunace tutacaq yeri. Şu sebepten Vladimir Putin uquq ve aqılğa zıt bir şekilde Ukraina vatandaşlarınıñ ve Rusiye vatandaşı olmağan diger insanlarnıñ Qırımdaki mal-mülkini musadere etmege qarar aldı. Şu sebepten Ukrainanıñ reintegratsiya nazirliginiñ saytı blok etildi. Müessise saytınıñ açıluvı bunı hatırlata: Qırım ilhaqı – ancaq işğalden reintegratsiyağa qadar bir müddet.
Putin ise böyle şeylerni eşitmege istemeydir. Çünki ilhaq altındaki Qırım olmasa, onıñ rejimi esas siyasiy kozını coya. Ve, onıñ mantığına köre, yarımada kerçekten de «tuvğan limanına qayta bile». Ukrainağa.
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Vitaliy Portnikov, kyivli jurnalist, Qırım.Aqiqat müellifi