Mahsus Qırım.Aqiqat içün
Türkiye prezidenti Recep Tayyip Erdoğannıñ Ukraina paytahtına kerçekleştirgen ziyareti bitkeninen memleketi qırımtatarlarnıñ aqlarını qorçalamağa devam etecek. Erdoğannıñ aytqanına köre, Ukraina prezidenti Volodımır Zelenskıy Herson vilâyetinde 500 mesken qurmağa teklif etti, ve Türkiye tarafı bu ğayege qoltuttı. Onı tafsilâtlıca muzakere etmek içün Ukrainanı Türkiye Çevre ve şeercilik naziri ziyaret etecek.
Ve tek bu degil. Erdoğan, Kyivde camisi, mesken evler ve ofisi olacaq qırımtatarlar içün bina kompleksini qurmağa planlaştırğanını jurnalistlerge tarif etti. «Bizim içün qırımtatarlarnıñ mustaqil olması pek müim. Qırımlı qardaşlarımızğa siyaset, iqtisadiyat, diplomatiya ve medeniyet saalarında qoltutacaqmız. Hersonda atılacaq adımlarğa büyük emiyet beremiz», – dep qayd etti Türkiye prezidenti.
Ukrainadan ketken soñ da Türkiye prezidentiniñ Qırım mevzusınen meraqlanğanını köstere, atta aksine – Ukraina ziyaretleri bu meraqnıñ aksi ola
Erdoğannıñ bu sözleri Ukrainadan ketken soñ da Türkiye prezidentiniñ Qırım mevzusınen meraqlanğanını köstere, atta aksine – Ukraina ziyaretleri bu meraqnıñ aksi ola. Erdoğan içün qırımtatar problemi – aynı vaqıtta iç ve tış siyaset meselesidir. İç siyaset – çünki bu şekilde türk cemiyetiniñ diqqatını er vaqıt celp etken halqqa Türkiyeniñ diqqatını semetdeşlerine köstere bile. Tış – çünki qırımtatar halqınıñ aqları qayd etilip, regionda türk prioritetleriniñ sarsılmaz olğanı ve Ukraina topraq bütünligine qoltutqanı kösterile.
Aynı vaqıtta – bunı da añlamaq kerek – Qırım meselesi Erdoğan içün onıñ Rusiye prezidenti Vladimir Putin ile adiy olmağan munasebetlerde müim bir alet ola. Em de şimdi, Türkiye ve Rusiye menfaatları Suriyeniñ İdlib şeeri etrafında kene qarşılaşqan soñ.
Türkiyeniñ işğal etilgen Qırımda qırımtatarlarnıñ «aqlarını teminlev» Rusiye mistifikatsiyasınen razı olmaycağınıñ delilidir
Erdoğannıñ sözleri – Türkiyeniñ işğal etilgen Qırımda qırımtatarlarnıñ «aqlarını teminlev» Rusiye mistifikatsiyasınen razı olmaycağınıñ delilidir, bundan ğayrı – Ankaranıñ fikri Qırımtatar Milliy Meclisiniñ fikrine teñ kele. Bu serbest milliy temsilcilik merkeziniñ işini teminlev yoludır, tek Kyivde degil, işğal etilgen Qırım sıñırlarında, Herson vilâyetinde. Böyle merkez aynı vaqıtta siyasiy alet ve Rusiye akimiyeti çaresini qaldırmağan, Qırımda yaşamağa bermegenler içün sığınaq ola bile. Putin repressiyaları Ukrainanıñ işğal etilgen topraqlarında devam ete. Bu adiy repressiyalar degil, bu reinelerni aluv ola.
Ukraina akimiyetine deñişimler kerek, Kreml ticaret ve şantaj içün yañı-yañı «deñişim fondunı» tutmağa tırışacaq. Ve Ukraina prezidenti Volodımır Zelenskıy tarafından belli bir uzlaşuv yerine Putin azat etecek insanlarnıñ abadanlaştırıluvı Ankaranıñ müim bir gumanitar vazifesi ola bile. Rusiye zenaatdaşınen siyasiy santıraç oynağan Erdoğan bunı yahşı añlay.
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Vitaliy Portnikov, Kyivli jurnalist, Qırım.Aqiqat közeticisi