Mahsus Qırım.Aqiqat içün
Arhip Kuinciniñ «Ay-Petri. Qırım» resiminiñ Tretyakov galereyasından hırsızlanmasından daa yahşı timsal olamaz. Kündüz, betini saqlamayıp, er kes körgende ve maqsadı belli olmağanda, çünki bu nadir eserni ne saqlarsıñ, ne satarsıñ. Elbette, büyük sanat sevgisi sebep oldı, dep aytmaq mümkün – amma hırsız sanat aqqında pek az bile eken. Yahşı planlaştırılğan ahmaqlıq. Mahsus tedbir.
Qırımnıñ özü aynı şekilde hırsızlanmağan ediñmi? Kündüz, betini saqlamayıp, er kes körgende ve maqsadı belli olmağanda, çünki kimseni yabancı topraqnı öz topraq olaraq saymağa zorlamazsıñ. Elbette, tarih sevgisi sebep oldı dep aytmaq mümkün – amma Qırımnı hırsızlağanlar tarihnı pek yahşı bilmey.
«Qırımnı» qırımlı hırsızladı, buña kimse şaşmadı, dep tüşünem. Qırımlı, işte, resimni alıp ketti. Qırımda böyle soyları az edi yoqsamı – yañı Rusiye akimiyetinde kim vazife alıp ketti? Ne yazıq ki, resimni hırsızlağan kişi hırsız sayılacaq, Konstantinov, Aksenov ve atta Poklonskaya – devlet erbabları.
Çünki resimlerni sergiden hırsızlamaq, Putin Rusiyesine köre, – pek yaramay şey. Başqasınıñ toprağını, ayatını hırsızlamaq ise – pek alâ bir şey. Çünki Qırım – bizim.
Çünki «Qırım» artıq – bizim, dep tüşüngen edi Denis Çuprikov, belli resimni sergi divarından çıqarıp. Mence, hırsız devlette iç bir hırsız başqaca tüşünip olamaz. Daa yaqında ekranlardan «Qırım bizim!» dep qıçırğanlar ve bu seslerge quvanğanlar Kuinci resiminiñ hırsızlanmasından soñ metastazlar aqqında tüşünmeli. Hırsızlıqnı medeniyleştirüv metastazlarınıñ devlet siyaseti ve milliy bar oluv manası olaraq.
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
Vitaliy Portnikov, Kyivli jurnalist, Qırım.Aqiqat müellifi