Vinnıtsâ vilâyetinde Rusiye raketaları Ukrayinanıñ arbiy obyektlerine urdı. Bunı vilâyetniñ arbiy memuriyetiniñ yolbaşçısı Sergiy Borzov haber etti.
"Yazıq ki, Vinnıtsâ vilâyetinde bir qaç raketa arbiy obyektlerge urdı. Yaralanğanlar bar", - dep yazdı o Telegramda.
Sergiy Borzovnıñ qayd etkenine köre, raketa telükesi haberdar etüv sistemasınıñ aqsap işlegeniniñ sebepleri ögrenile.
İyülniñ 14-nde belli olğanına köre, Rusiye ordusı Vinnıtsâğa raketa ücümini kerçekleştirdi. Şeerniñ merkezinde bir qaç inşaat zarar kördi, Turmuş evi ögünde tahminen 25 maşina yandı. Darbe kündüz şeerde çoq insan olğanda oldı.
Ukrayına prezidenti Volodımır Zelenskıy Vinnıtsâğa kerçekleştirilgen raketa darbesini izaatlap, Rusiyeni «qatil memleket ve terrorist» dep adlandırdı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
