Rusiye mahkemesi tarafından 14 yılğa üküm etilgen Qırımlı vatandaş jurnalisti Vilen Temeryanov Rostov-na-Donudaki SİZO-1-den hastahanege alıp ketirildi. Bu aqta ömür arqadaşı Elmaz Temeryanova "Qırım birdemligi" cemaat birleşmesine haber etti.
Aqayınıñ tibbiy müessisede bulunğanını qadın Temeryanovnen aynı kamerada qalğan kişiniñ apayından bildi. Qırımlınıñ ömür arqadaşı şimdi bulunğan yerini bilmey.
"Maña aqayım jirovik alınması içün ameliyatqa alıp ketirildi, dep ayttılar. Şaştım, çünki jirovik olğanından haberim yoq edi", – dep tarif etti Elmaz Temeryanova.
O, Vilenniñ bulunğan yerini bilmek içün Rostov-na-Donudaki SİZO-1-ge telefon etti. Faqat anda böyle malümat berilmey, dep aytıldı. Qadın aqayınıñ hastahanege alınğanını bilgenini aytqan soñ, SİZO hadimi anda telefon etmege teklif etti.
Rostovdaki mabüsler eñ çoq tedaviylengen MOTB-19 resmiy muracaattan soñ malümat berile bile, dep haber etti.
"Resmiy muracaat yapıp, cevap beklemek – uzun iş. Men aqayımdan çoqtan bir haber olmağanı içün qasevetlenem. Eki aftadan berli bağlanmadıq", – dep ayttı ömür arqadaşı Elmaz Temeryanova.
2022 senesi arman ayınıñ 11-nde saba Qırımnıñ Canköy ve Canköy rayonında qırımtatar faalleriniñ evlerinde kütleviy tintüvler keçirildi, advokatlarnı tahqiqat tedbirlerine yibermediler, olar mobil bağnıñ kesilgenini bildirdiler. Vilen Temeryanova, Enver Kroş, Seityaya Abbozov, Murat Mustafayev, Edem Bekirov ve Rinat Aliyevni Rusiye quvetçileri Rusiyede yasaq etilgen "Hizb ut-Tahrirde" iştirak etkenlerinde qabaatlap yaqaladı.
İmaye tarafı bildirgenine köre, bu davanıñ esas delili 2015 senesi camide qayd etilgen subet sesi oldı. Emir Kurbedinov emin ki, onı sekiz yıldan soñ FSB arhivlerinden alğanlar. "Bu yıllar devamında bu insanlar taqip etilmeddi ve cemiyet içün bir telüke köstermedi", – dedi imayeci.
Mahkeme tahqiqatı vaqtında ne advokatlarğa, ne müvekkillerine mahkeme ekspertizağa yollağan malümatnen tanış olmağa imkân berilmedi. Bu müddet devamında mabüs qırımtatar faalleri tarafından bir terror ücümi ya da diger zorbalıq areketleri planları olmadı.