Başına çuval taqıp ormanğa alıp kettiler: Asan Egizniñ alıp qaçılmasınıñ tafsilâtları (video)

Mayıs 23-te, kündüz, Aqmescit yanındaki Colman (Pionerskoye) civarında Rusiye GİBDDsi (Yol areketiniñ telükesizligi devlet inspektsiyası) uniformalı belli olmağan şahıslar Qırımtatar Milliy Qurultayı delegatı Asan Egizni alıp qaçtılar. Maskalı kişiler onı mikroavtobusqa itep kirsetti, qoluna buğavlar ve başına çuval taqtılar. Mikroavtobusta Egizni yerge yıqtı ve, ayaqlarınen bastırıp, maşinanıñ tabanında tuta ediler. Onı Sablanıñ (Partizanskoye) yanındaki ormanğa ketirdiler. Egizniñ aytqanına köre, alıp qaçqanlardan doğrudan söylengen qorquzuvlar ya da qabaatlavlar olmadı. O, bu adiseni, qırımtatarlarnıñ qorqutulmasına doğrultulğan daa bir arekettir, dey.