Zevri Abseitov. Siyasiy mabüsniñ tarihı (video)

2016 senesi mayıs 12-de Bağçasarayda Rusiye telükesizlik hadimleri qırımtatarlarnıñ evlerinde bir sıra tintüvler keçirdi. Neticede dört Bağçasaray sakini ve olarnıñ arasında Zevri Abseitov yaqalanıp, terrorizmde qabaatlandı. Daa soñra bütün gruppa daa bir madde boyunca – akimiyetniñ zornen elge keçirilmesine azırlıq körüvde qabaatlandı. Yaqalanğanlar endi aman-aman eki yıl devamında tahqiqat izolâtorında bulunalar. Tahqiqat bitirildi ve Zevri Abseitovnıñ işi mahkemege berildi. Onıñ ve bütün Bağçasaraydaki «Hizb ut-Tahrir işi» gruppasınıñ mahkemesi Rostov-na-Donu şeerinde keçecek. Onıñ içün Rusiye cinaiy kodeksiniñ eki maddesi boyunca 20 yılğace azatlıqtan marum etilmek telükesi bar. «Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarnıñ qullanılmasını red ete ve Rusiyede adaletsiz olaraq taqip etilgenlerini aytalar. Rusiyeniñ Yuqarı mahkemesi «Hizb ut-Tahrir»ni, terrorizmge alâqası olğanında qabaatlap, yasaq etti. Aq-uquq qorçalayıcıları «Hizb ut-Tahrir işi» boyunca tevqif ve mahküm etilgenlerni siyasiy mabüsler ve diniy alâmetke köre taqip etilgenler, dep sayalar.