Baydarda birinci «Hizb ut-Tahrir» figurantlarınıñ tevqif etilüviniñ yıllığı münasebeti ile dua (video)

Balıqlava rayonınıñ Baydar (Orlıne) köyünde yanvarniñ 25-nde siyasiy mabüsler ve repressiyalarğa oğrağan qırımtatar faaliyetçileri ve musulmanlar içün cemaat duası yapıldı. Dua birinci «Hizb ut-Tahrir» figurantları apis etilgen kününiñ yıllığında yapıldı. Ruslan Zeytullayev, Nuri Primov, Rustem Vaitov ve Ferat Sayfullayevniñ tevqif etilgenleri yıllığında Baydarğa dua etmek içün Saq ve Aqmescit rayonları, Bağçasaray ve Qırımnıñ diğer yerlerinden qırımtatarlar keldi. Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.