Ukrayina ve Rusiye arasındaki yekâne keçit noqtası olğan Sumıdaki "Kolotilovka" (RF) — "Pokrovka" (Ukrayina) keçiş noqtasındaki gumanitar koridor vaqtınca qapatıldı. Bu aqta Ukrayinanıñ vaqtınca işğal etilgen topraqlarınıñ reintegratsiya meseleleri naziri, baş nazir muavini İrına Vereşçuk bildirdi.
"Sumı yönelişinde şimdi kerginleşüv. Duşman topraqlarımızğa ateş aça. Bugün "Kolotilovka-Pokrovka" gumanitar koridorınıñ işi toqtatıldı. Arbiy adamlarımıznıñ aytqanına köre, eñ az 10 künge. Bundan soñ "baqacaqmız", — dep bildiridi o, avgustnıñ 7-nde.
Şeerniñ arbiy memuriyetiniñ reisi Vladimir Artüh bildirdi ki, Sumıda vaziyet kergin, ava telükesi bir künden ziyade devam ete. Onıñ bildirgenine köre, Sumı vilâyetinde Sumı rayonınıñ beş cemiyetinden mecburiy tahliye yapıla.
Vladimir Artühniñ aytqanına köre, tahminen 6000 insannıñ tahliye etilmesi aqqında söz kete, olarnıñ arasında 425 bala.
Avgustnıñ 6-nda Rusiye yerli akimiyeti Rusiye Federatsiyasınıñ Kursk vilâyetiniñ Sudjan ve Kornev rayonlarında sıñırnı bozmağa tırışqanları aqqında bildirdi. Rusiye Mudafaa nazirligi ukrayin arbiylerini Rusiye Federatsiyasınıñ Kursk vilâyetindeki Rusiye mevzilerine ücüm etkeninde qabaatladı.
Putin, Rusiyeniñ Kursk vilâyetindeki vaziyetni izaatlap, Kıyivni "büyük provokatsiya"da qabaatladı.
Rusiyeniñ Kursk vilâyetinde avgustnıñ 7-nde fevqulâde vaziyet ilân etildi, dep bildirdi region gubernatorınıñ vazifelerini eda etken Aleksey Smirnov.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
