Ukrayına akimiyeti Qırım içün belgileycek yedek hadimleri arasına Rusiye-Ukrayına cenkiniñ veteranları, qırımtatar halqınıñ vekilleri ve köçip kelgenler kirecek. Bu aqta Ukrayına baş nazir muavini – Ukrayınanıñ vaqtınca işğal etilgen topraqlarnıñ reintegratsiya meseleleri naziri İrına Vereşçuk Qırım.Aqiqatqa tarif etti.
«Bu cebede Ukrayına mustaqilligi ve devletçiligi oğrunda küreşken veteranlar da (Qırım içün çalışacaqlarnıñ yedegi – QA). Bu eñ vatanperver gruppa dep tüşünemiz – cenkten keçken insanlar. Söz sırası, veteranlardan ibaret olacaq hadimler yedegi tek reber terkibi içün şekillendirilmeycek. Biz Ukrayına, işğalden azat etilgen Qırımımızda devletçilikni ğayrıdan tikleycek akimiyet vertikalini köz ögünde tutamız. Şimdi biz tamır halqlar aqqında aytamız. Rusiyeniñ Qırım işğalinden zarar körgen qırımtatarlar nasıl basqığa oğratılğanını bilesiñiz», – dep bildirdi Vereşçuk.
O, 2014 senesinden soñ Qırımdan çıqqan insanlar yedek hadimler sırasına kirecek, dep bildirdi.
«50 biñden çoq insan. Aralarında qadı, ekim, ocalar da bar. Olar da hadim yedeginiñ temeli olacaq», – dep bildirdi Vereşçuk.
O, Ukrayına akimiyeti Qırım içün hadim yedegini azırlap başlaycaq, dep bildirdi. Yarımada azat etilgen soñ birden çalışmağa azır olacaqlar.
Bıltır dekabr ayınıñ soñunda Ukrayına arbiy istihbarat yolbaşçısı Kırılo Budanov Ukrayına Qırımnı em küç, em diplomatiyanen keri alacaq, dep bildirdi.
Ukrayına Silâlı quvetleriniñ baş komandanı Valeriy Zalujnıy Qırımnı işğalden azat etüv imkânlarına qıymet kesip, birinciden Zaporijjâ vilâyetiniñ Melitopol şeerini kontrol altına almaq kerek, dep bildirdi.
Avropada ABD ordusınıñ sabıq komandanı Ben Hoces Ukrayına Qırımnı 2023 senesi yaznıñ soñuna qadar azat etecek, dep bildirgen edi.
Yanvarniñ 20-nde ABD ştab yolbaşçılarınıñ komitet yolbaşçısı Mark Milli «arbiy taraftan bu yıl Rusiye işğal etken Ukrayınanıñ bütün topraqlarından Rusiye ordusını çıqarmaq pek qıyın olacaq», dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
