Qırımnıñ Ukrayina tarafından ğayrıdan integratsiyası diger bölgelerge baqqanda daa qıyın olacaq ve ayrı bir yanaşmanı talap ete. Bunı "Ukrinforma" agentligine intervyü berir eken Ukrayınanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuk bildirdi.
"Ebet, Qırımnıñ reintegratsiyası qolay olmaycaq. Vaqtınca işğal etilgen diger topraqlarnıñ reintegratsiyasından daa qıyın olacaq ve ayrı bir yanaşmanı talap etecek. Belki de mahsus qanunnı da. Qattılıq ve yımşaqlıqqa kelgende: Ukrayina devlet akimiyetiniñ tiklenilüv ve adalet meselesinde sert qattı olmalımız", - dep qayd etti o.
Aynı zamanda, Vereşçuk, iqtisadiy ve gumanitar reintegratsiyasında çevik olmaq kerek, dep qoştı. Eñ esası evelki hatalarnı tekrar yapmamaqtır. Yarımadada Rusiye tesiri olmamalı, dep bildirdi nazir.
"Bu telükesizligimizniñ kefaletidir. Bu meselede biz yañı, avesli ve salâhiyetli kadrlarğa işanamız. Olar er şeyni keregi kibi yaparlar", - dep ayttı Vereşçuk.
Daa evel, Ukrayina Mudafaa nazirliginiñ Baş istihbarat idaresiniñ temsilcisi Andriy Yusov, Ukrayina ordusı işğal etilgen Qırımğa daa "sıcaq olğanda" kirecegini bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
