Keçken künü Qırımda 17 insan koronavirustan vefat etti, bir kün evelsi vefat etkenlerniñ sayısı 16 edi, avgustnıñ 22-nde ise 8 kişi koronavirustan vefat etti, dep aytıla Qırımnıñ Rusiye Sağlıq nazirliginiñ monitoring malümatında.
Umumen pandemiya vaqtında, müessise malümatına köre, Qırımda 2108 kişi koronavirustan vefat etti.
«5491 insan (COVID) ambulator tedaviylevde, 2738 kişi (COVID ve pnevmoniya) hastahanede buluna. Umumen 69211 COVID-19 hastası qayd etildi. Tüzelgen 58277 insan hastahaneden çıqarıldı», – dep aytıla haberde.
Hatırlatamız, Qırımda keçken künü 345 yañı COVID-19 hastası qayd etildi.
Rospotrebnadzor regional idaresiniñ malümatına köre, eki aftadan berli Kezlev Qırımda COVID-19 hasta sayısı ortalama sayısından çoq olğan regionlar arasına kire.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
