Aqmescitte yanvarniñ 24-nde Rusiye kontrolindeki Kiyev rayon mahkemesi «Veciye Kaşka davasını» baqtı. Dört mabüsi – qırımtatar faalleri Bekir Degermenci, Kazim Ametov, Asan Çapuh ve Ruslan Trubaç – Türkiye vatandaşı Yusuf Aytandan para talap etkenlerinde qabaatlana.
Mahkeme oturışuvı vaqtında prokuror Alina Logvinenko üç mabüsni SİZOdan ev apsine almağa rica etti. «Tanığan prokurorlardan eñ eyisi», – 58 yaşında Bekir Degermenci prokurornıñ muracaatını böyle izaatladı. Qadı muracaatnı qanaatlendirdi. Daa evel mahkeme 66 yaşında Asan Çapuhnı ev apsine avuştırğan edi.
Mabüsler bir yıl ve eki ay SİZOda yattı, sağlıqları fenalaştı. Qarar seslendirilgen soñ mabüslerniñ tuvğanları ve soy-sopları mahkeme salonından ağlap çıqtı. Uzun vaqıt içinde ilk sefer olar babaları, aqayları ve ağalarını evde körecekler.
Bekir Degermenci, Kazim Ametov, Asan Çapuh ve Ruslan Trubaç Rusiye uquq qoruyıcıları tarafından 2017 senesi noyabrniñ 23-nde Aqmescitte tutulğan edi. FSB ve SOBR mahsus tedbirleriniñ şaatı qırımtatar milliy areketiniñ veteranı Veciye Kaşka oldı. Semetdeşleri tutulğan soñ Kaşka yaramadı, «acele yardım» çağırıldı. Lâkin Veciye Kaşka hastahanege bile baramayıp yolda can berdi.
Facebook Forum