Qırımtatar faali, «Veciye Kaşka davasınıñ» mabüsi Kâzim Ametovnıñ sağlıq vaziyeti fenalaştı, dep bildirdi advokat Emil Kürbedinov. Bu aqta «Qırım birdemligi» birleşmesi haber ete.
«Tahqiqat izolâtorında Kâzim Ametovnı ziyaret ettim. Sağlığı fenalaşa, közleri ket-kete daa zayıf ola, qan basımı, yürek ve aşqazan problemleri bar olğanını ayta», – dedi Kürbedinov.
2017 senesi noyabrniñ 23-nde Aqmescitte Rusiye telükesizlik hadimleri, Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşından para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
