Advokat Nikolay Polozov, 4 yıl evelsi Qırımda qırımtatar milliy areketiniñ veteranı Veciye Kaşka facialı bir şekilde vefat etti, dep hatırlattı. Onıñ tuvğanları qadınlarnıñ ölüminde Rusiye quvetçileriniñ qabaatı bar dep ayta ve Avropa insan aqları mahkemesine şikâyet etti. Advokatnıñ aytqanına köre, mahkeme şikâyetni qabul etti, amma bu dava baqılacaq kün daa belli degil.
«Rusiye akimiyeti ölümini kerekli kibi tahqiq etmege razı olmadı. Quvetçiler mesüliyetke çekilmedi. Avropa mahkemesi Veciye Kaşkanıñ oğlu bergen şikâyetni qabul etti. Dava baqılacaq kün belli degil», – dep bildirdi Polozov.
Avropa insan aqları mahkemesi «Veciye Kaşka davası» boyunca şikâyetni qabul etkeni aqqında Polozov daa yanvar ayında bildirgen edi. Areketleri şikâyet etilgen devletke şikâyet yollanıla, taraf onı baqıp, mahkemege yazma izalar bermeli.
«Veciye Kaşka davası»
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
2019 senesi aprelniñ 7-nde Rusiye kontrolindeki Aqmescitniñ Kiyev rayon mahkemesi para talap etüvde qabaatlanğan «Veciye Kaşka davasınıñ» mabüslerine üküm çıqardı. Ruslan Trubaç, Bekir Degermenci ve Kazim Ametov 3 yılğa şartlı olaraq üküm etildi, 3 yıl sınav müddeti olaraq belgilendi. Asan Çapuh 3,5 yıl şartlı apis cezasını aldı, 3 yıl sınav müddeti olaraq belgilendi.
Bekir Degermenci, Asan Çapuh, Kazim Ametov ve Ruslan Trubaç qabaatlarını tanımadı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
