Kreml kontrolindeki Qırım Yuqarı mahkemesi «Veciye Kaşka davasınıñ» oturışuvını başqa künge avuştırdı. Bu aqta advokat Edem Semedlâyev bildirdi.
Semedlâyev oturışuvnı başqa künge avuştırmağa rica etti, çünki Yuqarı mahkemeniñ nezaret altında tutuv ve advokatnıñ itiraz arizasınen bağlı qararları tercime etilmedi. Bekir Degermenci rus tilini yahşı bilmegenini ve tercime aqqından faylanmağa istegenini bildirdi.
Muracaat baqılğan soñ oturışuv salı künü, noyabrniñ 27-ne, saat 10:00-ğa avuştırıldı.
Daa evel haber etilgeni kibi, Kreml kontrolindeki Qırım Yuqarı mahkemesi noyabrniñ 22-nde «Veciye Kaşka davasınıñ» malümatını ögrenmek içün bu dava mabüsleri Bekir Degermenci, Ruslan Trubaç ve Kazim Ametovğa berilgen müddetni qanunğa uyğun olaraq tanıdı.
2017 senesi noyabrniñ 23-nde Aqmescitte Rusiye telükesizlik hadimleri, Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
