«Veciye Kaşka davasınıñ» mabüsi Asan Çapuh Aqmescit şeer hastahanesinde tibbiy teşkerüvden keçe ve tedaviylene. Bundan soñ ekinci derece saqatlığını almaq içün sebebi olacaq. Bu aqta advokatı Ayder Azamatov Qırım.Aqiqat Radiosınıñ «Krımskiy veçer» yayınında tarif etti.
İmayeciniñ aytqanına köre, Çapuhnıñ saqat qalması SİZOda tutulmasınen bağlı.
«Müvekkilim aman-aman 11 ay SİZOda keçirdi, onıñ mikroinsultı ve gipertonik krizi oldı. SİZOdan Asan ağa bam-başqa adam olıp çıqtı – pek hasta. Maña köre, oña o vaqıt endi saqatlıq bermek mümkün edi», – dedi advokat.
Azamatovnıñ bildirgenine köre, soñki vaqıtları ev apsinde olğanda müvekkili eki kere sağlıq vaziyeti fenalaşqanı içün hastahanege alınğan edi. Çapuh tibbiy teşkerüvden keçe.
«Asan ağa tibbiy teşkerüvden keçe ve tedaviylene, bundan soñ saqatlıq komissiyasına vesiqalarnı berecek. O, ise bu statusnı bermege-yoqmı qarar alacaq. O, endi çalışıp olamaz, ekinci derece saqatı olacaqtır», – dep tarif etti advokat.
Aqmescitniñ Kiyev rayon mahkemesi «Veciye Kaşka davası» mabüsleriniñ tevqifini mayısnıñ 7-ne qadar uzatqan edi.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
Yanvarniñ 27-nde Kreml kontrolindeki Aqmescitniñ Kiyev rayon mahkemesi «Veciye Kaşka davasınıñ» mabüsleri Bekir Degermenci, Kazim Ametov ve Ruslan Trubaçnıñ sıñırlav tedbirini deñiştirip, olarnı ev apsine aldı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
