Kreml nezaretindeki Aqmescit şeeriniñ Kiyev rayon mahkemesi, “Veciye Kaşka davası”nıñ iştirakçisi Ruslan Trubaçqa hastahaneni ziyaret etmek ruhsetini berdi. Bu aqta fevral 20-sinde advokat Emil Kurtbedinov bildirdi.
“Ruslan Trubaçnıñ imayecisi, müşterisiniñ ev tevqifiniñ imkânlarını keñleştirmek ve hastahanege barmaq çaresini bermege muracaat etti. Muracaatı qabul olundı, endiden o, saat 7:00-dan saat 14:00-ğace tibbiy baqıluvğa qatnay bile”, - dep qayd etti Kurtbedinov.
Ruslan Trubaçnıñ soyları, SİZO-da bulunmasından aşqazan, içekler, tişler ve közlerine zarar tiygenini bildirdi.
Bundan ğayrı fevral 20-sinde keçken oturışta qabaatlav tarafınıñ şaatı Yuriy Baranovnıñ şaatlığı oquldı. Onıñ özü, Qırım sıñırcılarınıñ malümatına köre, Qırımdan ketti.
Kelecek oturış fevral 26-sına tayin etildi. Onda Türkiye vatandaşı Yusuf Aytan sorğuğa çekilecegi beklenile.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
Yanvarniñ 27-nde Kreml kontrolindeki Aqmescitniñ Kiyev rayon mahkemesi «Veciye Kaşka davasınıñ» mabüsleri Bekir Degermenci, Kazim Ametov ve Ruslan Trubaçnıñ sıñırlav tedbirini deñiştirip, olarnı ev apsine aldı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
