"Veciye Kaşka davası" boyunca maküm etilgen Asan Çapuhnı rusiyeli Aqmescit polis bölüginden yiberdiler. Advokat Ayder Azamatovğa köre, politsiya hadimleri müşterisini sorğuğa çekecek edi, amma o, Rusiye Anayasasınıñ 52-ince maddesine atıf etip, red etti. Advokatnıñ özüni Çapuhha kirsetmediler.
"Politsiya bölüginde o, saat 13:30-dan buluna edi. Şimdi o evde. (Çapuhnı - QA) sorğuğa çekmege tırıştılar, amma o, Rusiye Anayasasınıñ 52-ince maddesine atıf etip, red etti. Protokol yazmayıp, yiberdiler", - aytıp berdi Azamatov Qırım.Aqiqat mühbirine tefsir beberek.
Advokat, politsiya hadimleri Çapuhtan ne sorağanını aytmaqtan vazgeçti, ve, bu sualge keççe cevap berir, dep ayttı.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
Rusiye devlet qabaatlavı «Veciye Kaşka davasınıñ» mabüsleri içün şartlı apis cezaları berilmesini istedi. «Qırım birdemligi» cemaat birleşmesiniñ bildirgenine köre, Rusiye prokuraturası Asan Çapuhnı üç buçuq yılğa, Bekir Degermenci, Kazim Ametov ve Ruslan Trubaçnı üç yılğa üküm etmege talap ete, er birine üç yıl sınav müddeti berile bile.
Üküm apellâtsiyası baqılmağance, iştirakçilerniñ episi ev tevqifi altında bulunacaq.
Aynı vaqıtta, bundan evel Bekir Degermenci, Asan Çapuh, Kazim Ametov ve Ruslan Trubaç qabaatlarını tanımağan edi.
