Ukrayına prezidentiniñ ofisi bildirgenine köre, Rusiye raketalarınıñ çoqusı memleketniñ merkezinde ve şimalinde energetik infrastruktura obyektlerine tüşti, «vaziyet kritik».
«Paytahttaki vaziyet pek qıyın, qazaiy söndürüv cedvelleri kirsetile. Ukrenergo energosistemanı balanslamaq ve donatmalarda qazalarğa yol bermemek içün elektrik söndürmege mecbur», – dep yazdı Ukrayına prezidenti ofisiniñ yolbaşçı muavini Kırılo Timoşenko.
Lviv, Vinnıtsâ, Volın, Rivne, Jıtomır, Harkiv, Poltava ve Kirovoğrad vilâyetlerinde kritik infrastrukturanıñ Rusiye ücümlerine oğrağanı haber etildi.
Soñki vaqıtları Rusiye kritik infrastruktura, hususan energetika obyektlerine qarşı ücümlerni quvetleştirdi. Ukrayına akimiyetiniñ malümatına köre, Ukrayınada Rusiye atışları sebebinden energetik infrastrukturanıñ tahminen 40%-ı «ciddiy seviyede zarar kördi». Bu sebepten elektrik energiyası sıq-sıq söndürile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
