Qırımda "Qırım musulmanları davası" boyunca apiske alınğan cemaat jurnalisti Vilen Temeryanovnıñ tahqiqat izolâtorı şaraitlinde körme qabiliyeti fenalaştı. Bu aqta "Qırım birdemligi" haber ete.
Qayd etilgenine köre, er şeyni baqmağa tırışqanda, devamlı kerginlşkten onıñ közleri ağıra. Temeryanov tuvğanları bergen közlüklerni qullanmağa mecbur, dep bildirdi onıñ ömür arqadaşı Elmaz Gaziyeva.
''Bir insandan üç metr uzaqlıqta tursam da, onıñ yüzüni ayırıp olamayım. Evelden maşnanı raat aydamağa, uzaqtan köre bile edim'', - dedi Temeryanov ömür arqadaşına.
Jurnalistni aşayt ve SİZOda areketsiz yaşayışnen bağlı bağlı aşqazan ağrıları da raatsızlay.
Temeryanovnıñ aytqanına köre, oña tez vaqıtta tiş ekiminiñ yardımı kerek.
''Tişlerden iç bir şey qalmay. Bu büyük bir mesele ve o apishanede başlandı", - dep qayd etti onıñ apayı.
Avgustnıñ 11-nde Rusiye FSBsiniñ hadimleri Canköy rayonınıñ Frayleben (Volnoye) qasabasında «Qırım birdemligi» ve «Grani.ru» mühbiri Vilen Temeryanovnıñ evini tintti. Onı Rusiyede yasaqlanğan «Hizb ut-Tahrir» İslâm siyasiy firqasında iştirak etkeninde qabaatladılar. Rusiye quvetçileri o künü tintüvler vaqtında beş qırımtatar faalini apiske aldı.
Rusiye kontrolindeki Aqmescitniñ Kiyev rayon mahkemesi tutulğan qırımtatarlarnı apiske aldı.
«QırımSOS» aq qorçalayıcı teşkilâtı avgustnıñ 11-nde Qırımda tintüvlerden soñ tutulğan qırımtatarlarnı siyasiy mabüs dep adlandırdı.
Ukrayina prezidentiniñ Qırım Muhtar Cumhuriyetindeki temsilciligi qırımtatarlarnıñ evlerinde keçirilgen tintüvlerni takbih etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
